0 10جنيه الملعونة 😂😂😂
السلام عليكم و رحمة الله و بركاته .
اهلا متابيعنا الكرم فى مداونة المهندس
جئة اليكم اليوم باحد القصص الفكهيه
من تأليف الاستاذ محمد بركات .
وهى قصة مضحه
واليكم القصه والتى تبداء
بعنوان ..
المائة الجنيه الملعونه،
ال 100 جنيه دى كنت واخدها من الحاجة 😂
و أكيد انتو عارفين بقى الباقى 😂😂
و زى أى مواطن عادى راكب الميكروباص من حدايق حلوان لحلوان نفسها
ركبت فى الكرسي اللى ورا السواق مباشرةً
مفيش محطة و واحد شاور العربية وقفت ركب الراجل فى الكرسي اللى ورايا
انا مش مركز معاهم و مركز مع تليفونى الأمور بالنسبالي أبسط من انى اركز مع الناس قوى يعنى
المهم شوية و الراجل اللى ركب خبط على كتفى فا الطبيعى مديت ايدى من غير حتى ما ابص
الراجل حط الأجرة ف ايدى و قالى واحد حلوان
اوتوماتيك روحت قايله واحد حلوان ياااسطى
الاجرة 3.5
السواق قالى الجنيه الورق دا مقطوع
الراجل رد بسرعة ماله ياااسطى و لا مقطوع و لا فيه حاجة
و بدأ الكلام يزيد و السواق مش عاوز الجنيه و الراجل راسه و ألف سيف ما هياخد الجنيه
و هوب راح السواق راكن و الحوار هيكبر قولتله اطلع يا اسطى و انا هغيرلك الجنيه مش أزمة أبوس ايدك هنتأخر
المهم خلصت الحوار و السواق دور و مشي و الدنيا هديت
كام محطة و ناس نزلت و ناس ركبت و جه واحد و مراته و بنته
روحت راجع ورا خالص و سيبتلهم الكرسي على بعضه
وصلنا لحد محطة ركن فاروق و الدنيا مستقرة و هادية و تمام التمام
كل اللى حصل فوق ده كان عادى و وارد يحصل فى اى حتة و اى وقت
إنما اللى جاى دا مش عادى خالص بقى 😂
الراجل صاحب الجنيه المقطوع ده اولا انا متأكد أنه أفاتار 😂😂😂😂
طوله و عرضه و شكل و ودانه و مناخيره و معرفش عنده ديل بقى و الا لأ 😂😂😂
فجأة و بدون اى مقدمات قال بصوت عالى ابعت يا اسطى باقى ال 100 😮
لاول لحظة كدة حسيت انى متلغبط و أن ده حد غيره
السواق بص ف المرايا و قاله 100 ايه
قاله انا باعتلك واحد من 100 ياااسطى حلوان
السواق تحس أنه داخل على جلطة و انا شايف وشه فى المرايا بيتشنج تشنجات مش طبيعية 😂😂
ساعات كدة من كتر الثقة و الاريحية اللى بيتكلم بيها اللى قدامك يخليك تشك ف نفسك
و أنا بصراحة مش عارف انا شاكك فى نفسي و الا خايف اتكلم الافاتار ده يعضنى 😂😂
السواق طبعا وقف و بص للناس اللى وراه و قالهم حد دفع ميات يا جدعان
الناس قالوله احنا لسة راكبين منعرفش و الله
و الراجل يقوله عليا الطلاق دافعلك 100 جنيه و السواق يقلب فى نفسه و على التابلوه و فى سقف العربية و يقوله يا عم انت شوف فلوسك و انا قاعد ورا هتجنن و هموت من الرعب 😂
و معالم وش الراجل قلبت على شكل غريب اكتر ما هى غريبة اصلا
و السواق لمحنى 🙄 قاعد ورا قالى مش انت يا أستاذ اللى كنت بتناولنى الأجرة
قولتله اه انا
الراجل دا بعت 100 جنيه ؟
قولتله و الله هو ادانى ال 3.5 اللى كان فيهم الجنيه المقطوع بس
راح الافاتار ده قايم نص قومة و قالى لا يا روح امك انت و هو الفلوس دى كانت بتاعت اللى ورايا إنما أنا دافع 100 جنيه
و قايم و بيتحرك ناحيتى 😮😮😮
و أنا بشكل بهلوانى روحت ناطط من شباك العربية 😂😂
و قولتله انت راجل حرامى و نصاب 😂😂
انا حرامى يا ابن ال ......... بلاش بقى عشان الرقابة 😂
و راح لافف و نازل من العربية ورايا
و كانت الكارثة 😂😂
الراجل نزل من هنا و السواق راح طاير بالعربية 😂😂
الراجل جري وراه خطوتين و وقف و راح لاففلى
طبعا أنا بلعن السواق و الساعة اللى ركبت فيها العربية
و هعمل ايه مع المتوحش اللى داخل عليا ده
مفيش حل غير انى أجرى 😂😂
و الراجل راح مزعق حرااااااامى حرااااااااامى و طار ورايا
أقسم بالله يا جدعان
الشعب المصرى دا ملوش حل بصراحة 😂😂😂
الناس اللى كانت فى الشارع كلها جريت ورايا
و طبعا مهما جريت هتتقفش و كل ما هتجرى هتثبت عليك التهمة 😂
لمحت ميكروباص واقف روحت جارى ع السواق 😂😂
قولتله الراجل دا كان عاوز يسرق زميلك و لما كشفته قال أن انا اللى حرامى و عاوزين يضربونى
و سبحان الله السواق معرفش صدقنى و الا انا صعبت عليه
راح نازل و جابنى ف ضهره و وقف للناس اللى جايا تقفش بركات الحرامى 😂😂😂
و هدا الناس و الراجل الافاتار ده جى هايج و بدأت الناس تهديه
المهم السواق قاله اركب و انا لو ليك حق هجيبهولك
و راح مركبنا احنا الاتنين و طار على الموقف
من فضل الله لقينا السواق الاولانى لسة واقف
نزلت قولتله يا راجل يا ندل بقى انا خايف عليك تسيبنى و تمشى
السواقين اتلموا بقوا اكتر من عشرين سواق
و من هنا لهنا الراجل معرفش يعمل معاهم حاجة و قالهم حسبي الله و نعم الوكيل و عينه بتطلع شرار كل ما يبصلى
و أنا ما صدقت قمت خالع منهم و واخد تاكسي و راجع 😂
شنطتى بقى فين الله أعلم هل هى فى العربية الأولى فى العربية التانية رميتها و انا بجرى من الخوف مش فاكر
كل اللى انا فاكره إن كان فيها 100 جنيه بردو 😂😂
و الحمد لله انها ضاعت لو كانت معايا و فتشوها مكانش زمانى بحكيلكم دلوقت 😂😂😂
شكرا ع ال 100 جنيه يا حجة 😂😂
اتمنى تكون الحكاية عجبتكم. واستنونا مع حكاية من حكيات بركات